Nos visitó…
El 17 de octubre de 2009 nos visitó un grupu de amigus procedentis de Badajó capital, que se reunin los finis de semana pa andal juntus, estu que se llama ahora senderismu.
Venían siguiendo los pasus de San Pedru de Alcántara desde el conventu del Palancal, dondi según refirierun habían comíu una opípara merienda, y así debía sel polque al final de la visita turística pol el pueblu a algunus les noté ciertu cansanciu.
Tenían el interé el grupu esti -comandau pol un tal Antoniu- en conocel el Conventu, y hacia allí nos encaminamus, tras haberlus recogíu en nuestra bella Plaza, adondi aguardaban. Allí reconocí a María, una campañera docenti que conocí en el IES Bárbara de Braganza de Badajó, y también a su simpáticu maríu; aunque simpáticus, a decil verdá, eran toítus.
Nos encaminamus la calli San Franciscu arriba hacia el monumento en cuestión, pasando por las ermitas de San Roqui y la del Cristu del Humillaeru, que enseguía les plantearun interrogantis.
Al llegal al Conventu les jidi unas fotos, y actu seguíu les hable´ de los condis, de sus enterramientus, de la iglesia, del claustru y sus pinturas; y mostrarun un gran interés y admiración pol lo que les conté, y enseguía empezarun otra vé los interrogantis: ¿Y por qué no se restaura? ¿Y de quién es? ¿Y qué pena, no?
Dejamus atrá las ruinas de nuestru queríu conventu y marchamus pol la calli San Franciscu de nuevu, esta vé en sentíu contrariu, pa dirigilnus a la Plaza. En el trayectu fuerun descubriendu callis de estrechu trazau y caças con puertas de sabol añeju que les fascinarun, aunque a decil verdá, les fascinarun más los dulcis –entre ellus cagajonis- que a la chita callandu habían comprau a las Monjitas y que amablimenti me ofrecierun. Amablimenti también los rechazé (¡Tenía yo una sequina tras la charla del conventu, que pa comel cagajonis!)
Desde el conventu de la Salú, calli Seis Rejas abaju, fuimus a paral al templu de San Pedru, que les expliqué, “culu del demoniu” incluíu.
Finalmenti llegamos a la Plaza (“la joya de la Corona”) dondi me pidierun pol favol, aunque ya era un pocu tardi, que les explicara un poquinu de su historia a lo que, comu no, accedimus.
Despedí a este amable grupo de amigos en nuestra bella plaza, cuando el sol ya se había ocultado tras el Arco de Mendos.
Hasta siempre amigos.
José María Velaz
Versión para imprimir